گؤز آچدی سحر، بیرده نیگاریم یادا دوشدی
الدن گئدن اؤل، شانلی باهاریم یادا دوشدی
باغدا دؤلانیب حسرت ایله لاله‌یه باخدیم
نرگیس باخالی، چشم خوماریم یادا دوشدی
یاردان آرالی نه گئجه‌م اولدی،نه‌ده گوندوز
اون سوز دولانیب سونکی قراریم یادا دوشدی
یاد اولسون اؤ خوش گونلری بیرلیکده اولاندا
یالقیز دولانیب عشوه لی یاریم یادا دوشدی
بولبول اؤخودی اؤز گولونه شانلی غزللر
منده ائشیدیب، غملی هَزاریم یادا دوشدی
یار عطرینی گوللردن آلیب حسرته دولدوم
باغلاردا آچان گوللو دیاریم یادا دوشدی
سسلندی بیرآن قلبیده غمدن دولو سازیم
گؤز داشدی یئنه، زخمه لی تاریم یادا دوشدی
هیجران گئجه‌سین ظولمته اوخشاتمیشام حسنا
گؤز آچدی سحر، بیرده نیگاریم یادا دوشدی
حسنا شقاقی آذر
بازدید : 202
سه شنبه 28 بهمن 1399 زمان : 14:38
